ភ្នំពេញៈ តំណាងរាស្រ្តគណបក្សកាន់អំណាចកាលពីថ្ងៃអង្គារ
បានបោះឆ្នោតជាឯកច្ឆន្ទអនុម័តច្បាប់ដែលនឹងបង្កើតក្រសួង
រដ្ឋាភិបាលថ្មីមួយទៀត និងពុះក្រសួង ឧស្សាហកម្មរ៉ែ និង ថាមពល ជាពីរ។តំណងរាស្រ្ត ៦៦ រូប មកពីគណបក្សប្រជាជន បានបោះឆ្នោតបង្កើតក្រសួង មុខងារសាធារណៈ ដែលនឹងត្រួតពិនិត្យលើកិច្ចការរបស់មន្រ្តីរាជការ និងបានបោះឆ្នោតពុះក្រសួង ឧស្សាហកម្ម រ៉ែនិង ថាមពល ជាពីរ គឺក្រសួង ថាមពល និង រ៉ែ និងក្រសួង ឧស្សាហកម្ម និង សិប្បកម្ម។ លោក ជាម យៀប តំណាងរាស្រ្ត គណបក្សប្រជាជន បានថ្លែងថា ការពុះក្រសួង ឧស្សាហកម្ម រ៉ែ និងថាមពល នឹងផ្តល់លទ្ធភាពដល់មន្រ្តីក្នុងការបំពេញការងារបានច្រើនថែមទៀត។ លោកបន្តថា៖
«ប្រទេសយើង កំពុងអភិវឌ្ឍគ្រប់វិស័យ ដូចនេះ វាចាំបាច់ត្រូវគ្រប់គ្រងធនធានមនុស្ស ជាពិសេសមន្រ្តីរាជការ។ ខ្ញុំគាំទ្រក្រសួងថ្មី»។
កន្លងមក គណបក្សប្រឆាំង បានរិះគន់ការបង្កើតនេះ ដោយថា វាពុំជួយបង្កើនប្រសិទ្ធភាពការងារទេ តែផ្ទុយទៅវិញវានឹងបង្កើតការិយាល័យធិបតេយ្យចាយវាយថវិកាជាតិ ឥតប្រយោជន៍។ តំណាងរាស្រ្តគណបក្សប្រឆាំង មិនអាចទាក់ទងដើម្បីសុំការអត្ថាធិប្បាយជាថ្មីទៀតបានទេ កាលពីថ្ងៃអង្គារ អំពីការបង្កើតក្រសួងថ្មីនេះ។
លោក ឈៀង វុន ដែលជាតំណាងរាស្រ្តម្នាក់ បោះឆ្នោតគាំទ្រការបង្កើតក្រសួងថ្មីនេះ បានថ្លែងថា ថ្លៃផលិតសិប្បកម្មក្នុងស្រុកខ្ពស់ បាននាំឲ្យមានការនាំចូលពី ចិន វៀតណាម និងថៃ មកកាន់តំបន់ទេសចរណ៍ ដូចជា អង្គរវត្ត។
លោកបានបន្ថែមថា ក្រសួង សិប្បកម្មថ្មី នឹងធ្វើការជំរុញសិប្បកម្មក្នុងស្រុក។ លោក វុន បានបន្តថា៖ «ផ្អែកតាមការប៉ាន់ប្រមាណរបស់ខ្ញុំ ផលិតកម្មវត្ថុអនុស្សាវរីយ៍ក្នុងស្រុកប្រហែល ២០ ភាគរយ [ធ្វើនៅកម្ពុជា] ដោយសារតែថ្លៃផលិតខ្ពស់។ យើងត្រូវផ្តោតលើឧស្សាហកម្ម និងសិប្បកម្ម។ យើងត្រូវតែលើកទឹកចិត្តឧស្សាហកម្មខ្នាតតូច»។
លោក ពេជ្យ ប៊ុនធិន រដ្ឋមន្រ្តីក្រសួង មុខងារសាធារណៈ ដែលត្រូវបានតែងតាំងថ្មីបានថ្លែងប្រាប់រដ្ឋសភាបន្ទាប់ពីការ អនុម័តបង្កើតក្រសួងរបស់លោកថា៖ «ចាប់ពីពេលនេះតទៅ រដ្ឋាភិបាល មានឧបករណ៍ថ្មី គឺក្រសួងថ្មីបន្ថែម ដើម្បីដឹកនាំនិងគ្រប់គ្រងមន្រ្តីរបស់យើងឲ្យល្អនិងអនុលោមតាម គោលនយោបាយរដ្ឋាភិបាល។ ខ្ញុំសន្យាថា ខ្ញុំនឹងទទួលយកនូវអនុសាសន៍ទាំងអស់ ដើម្បីធ្វើការតាមតម្រូវការរបស់មន្រ្តីរាជការទូទាំងប្រទេស»។
យោងតាមក្រុមអ្នកវិភាគ បានឲ្យដឹងថា មន្រ្តីរាជការកាន់តែច្រើនឡើងមិនពេញចិត្ត ចំពោះប្រាក់ខែដ៏តិចតួចចាយមិនគ្រប់របស់ពួកគេទេ ជាហេតុធ្វើឲ្យមន្រ្តីរាជការជាច្រើនបានបោះឆ្នោតឲ្យគណបក្ស ប្រឆាំងកាលពីថ្ងៃ ទី២៨ ខែ កក្កដា ដោយសារតែគោលនយោបាយរបស់គណបក្សប្រឆាំង បានសន្យាផ្តល់ប្រាក់ខែដល់មន្ត្រីរាជការយ៉ាងតិច ២៥០ ដុលារក្នុងមួយខែ៕ TK
ប្រភពៈ ភ្នំពេញប៉ុសិ៍្ត
No comments:
Post a Comment