ភ្នំពេញ ៖ កុមារី រិទ្ធ សូនីតា អាយុ៩ឆ្នាំ
និងជាកូនកំព្រាឪពុកម្ដាយរស់នៅជាមួយជីតា
មានទេពកោសល្យខាងសិល្បៈ ចម្រៀងដ៏ពីរោះក្រអួន
ស្រដៀងទៅនឹងអ្នកចម្រៀងជំនាន់ដើម អ្នកស្រី រស់ សេរីសុទ្ធា
និងអ្នកស្រី ប៉ែន រ៉ន ដែលធ្វើឱ្យអ្នកស្ដាប់មិនជិនណាយ និងកោត
សរសើរពីសំនៀងដ៏ពីរោះនេះ ។
លោក
ឡុង សេងអួន អាយុ៦១ឆ្នាំ រស់នៅភូមិព្រែកហូរលិច សង្កាត់ព្រែក
ហូរ ក្រុងតាខ្មៅ ខេត្ដកណ្ដាល ដែលត្រូវ ជាជីតាកុមារី រិទ្ធ
សូនីតា បានប្រាប់នគរ វត្ដថា សូនីតា គឺជាក្មេងកំព្រាដែលឪពុក
ម្ដាយបានបែកតាំងពីនាងមានអាយុ៣ខែ គ្រានោះ
ម្ដាយរបស់នាងទៅរស់នៅជា មួយនឹងស្ដ្រីដូចគ្នា
(ស្រីស្រឡាញ់ស្រី) ។ ដោយឡែកឪពុកក៏មានប្រពន្ធថ្មីទុកឱ្យ
នាងរស់នៅឯកោ ទើបលោកសម្រេច យកមកចិញ្ចឹមបីបាច់ថែរក្សា ឱ្យរៀន
សូត្រ ដែលឆ្នាំនេះ រិទ្ធ សូនីតា រៀនថ្នាក់ ទី៤
នៃសាលាបឋមសិក្សាហេងសំរិន ព្រែកពោធិ៍ ។
លោក ឡុង សេងអួន បានបន្ដថា តាំងពីក្មេងអាយុបាន៥-៦ឆ្នាំ រិទ្ធ សូនីតា តែងតែចូលចិត្ដស្ដាប់បទចម្រៀងបែប មនោសញ្ចេតនាពីសម័យមុនៗ និងបទ កន្ដ្រាក់អារម្មណ៍របស់អ្នកស្រី ប៉ែន រ៉ន ។ ពេលដែលម្ដាយមីងរបស់នាងឈ្មោះ ឡុង សុជាតា ដែលត្រូវជាកូនរបស់ លោកច្រៀងបទចម្រៀងអ្នកស្រី រស់ សេរីសុទ្ធា , ប៉ែន រ៉ន រូបគេតែងតែស្ដាប់ និងច្រៀងតាមរហូតដល់នាងចេះជាង៤០ បទយ៉ាងស្ទាត់ជំនាញ ទាំងការបញ្ចេញ ទេពកោសល្យសំនៀង ស្ទើរតែប្រហាក់ ប្រហែលទៅនឹងអ្នកចម្រៀងសំឡេងមាស ជំនាន់ដើម អ្នកស្រី រស់ សេរីសុទ្ធា , ប៉ែន រ៉ន ។ លោកបន្ដថា មុនដំបូង កុមារី រិទ្ធ សូនីតា ចូលចិត្ដបទ(ខ្នើយ)របស់ កញ្ញា ស៊ុន ស្រីពេជ្រ ប៉ុន្ដែក្រោយមក នាងក៏បានយកចិត្ដទុកដាក់ស្ដាប់បទ ចម្រៀងសម័យមុនទៅវិញ ដូចជាបទ ពេលមេឃស្រទុំ, រលកដួងចិត្ដ, តើថ្ងៃ ណាបងវិលវិញ របស់អ្នកស្រី រស់ សេរីសុទ្ធា និងបទឈប់ព្រួយទៅបង, ឆ្នាំ អូន១៦ , ឆ្នាំអូន៣១ , ក្រអូប៣ដង របស់ អ្នកស្រី ប៉ែន រ៉ន ដែលបទចម្រៀងមិន តិចជាង៤០បទ នាងចេះច្រៀងយ៉ាង ស្ទាត់ជំនាញ ព្រមទាំងបញ្ចេញនូវសូរ សៀងដ៏អន្លង់អន្លោច ធ្វើឱ្យអ្នកស្ដាប់ចាប់ អារម្មណ៍និងកោតសរសើរថា រិទ្ធ សូនីតា ពិតជាមានសំឡេងស្រដៀងទៅនាងអ្នក ចម្រៀងជំនាន់ដើម ។
កាលពីមុន រដូវភ្ជុំបិណ្ឌកន្លងទៅ រិទ្ធ សូនីតា ក៏បានប្រឡងចម្រៀងសម័យដើម ក្នុងចំណោមបេក្ខជនជាច្រើននាក់ នាង ទទួលបានជ័យលាភីលេខ១ នៅស្ថានីយ ទូរទស្សន៍ CTN គឺបទឈប់ព្រួយទៅបង របស់អ្នកស្រី ប៉ែន រ៉ន ។ បើទោះជាជ័យ លាភីនេះ រិទ្ធ សូនីតា មិនទាន់បានទទួល ប្រាក់ឧបត្ថម្ភចំនួន៣លានរៀលពីអ្នករៀប ចំការប្រឡងចម្រៀងសម័យនេះក៏ដោយ ប៉ុន្ដែតាមរយៈការបង្ហោះសំនៀងដ៏សែន ពីរោះក្រអួន ធ្វើឱ្យទស្សនិកជនជាច្រើន បានស្គាល់នាងរហូតដល់មានកម្មវិធីជប់ លៀង រៀបអាពាហ៍ពិពាហ៍ ឡើង គេហដ្ឋាន សម្ពោធហាង ។ល។ នាងត្រូវ បានម្ចាស់កម្មវិធី ក្រុមតន្ដ្រីករ ហៅនាង ទៅច្រៀង ទទួលបានប្រាក់ឧបត្ថម្ភគ្រាន់ យកមកដោះស្រាយជីវភាពរស់នៅប្រចាំ ថ្ងៃ ក៏ដូចជាការរៀនសូត្រ ។
លោក ឡុង សេងអួន បានបន្ដថា ខ្ញុំ រំភើបចិត្ដណាស់ ពេលដែលបានឃើញ រាល់កម្មវិធីផ្សេងៗ មានមនុស្សចាស់ ក្មេងពេញចិត្ដ រិទ្ធ សូនីតា បញ្ចេញសូរ សៀង មិនតែប៉ុណ្ណោះ មានសប្បុរសជន ជាច្រើនក៏បានផ្ដល់ជាថវិកាលើកទឹកចិត្ដ ដែលពេលនេះ ក្រុមគ្រួសាររបស់លោក ពីមុនគ្រាន់តែជាកម្មករជាងផ្ទះ ក៏មាន ជីវភាពរស់នៅប្រសើរជាងមុនតាមរយៈ ចៅស្រីទទួលបានការឧបត្ថម្ភពីសប្បុរសជននានារាល់កម្មវិធីប្រគំ តន្ដ្រីម្ដងៗ ។
អ្នកស្រី ឆៃយ៉ា អាយុ៤៨ឆ្នាំ បាន និយាយថា ខ្ញុំធ្លាប់ឮតែអ្នកស្រី រស់ សេរីសុទ្ធា បានច្រៀងបទ មេឃមីស្រទុំ និងបទ តើថ្ងៃណាបងវិលវិញ ខ្ញុំពេញ ចិត្ដនិងត្រូវពីជីវិតរស់នៅពិតៗរបស់ខ្ញុំ ប៉ុន្ដែពេលដែលខ្ញុំឃើញកុមារី រិទ្ធ សូនីតា ច្រៀងបទខាងលើនេះ ខ្ញុំស្ទើរតែទប់ទឹក ភ្នែកមិនបាន ហាក់បីដូចជាគាស់កកាយ ពីជីវិតស្នេហា អ្វីដែលខ្ញុំបានជួបប្រទះ ជាច្រើនឆ្នាំកន្លងមក ។ អ្នកស្រីបន្ដថា សូនីតា មានសំនៀងពីរោះក្រអួននិងមាន ទេពកោសល្យផ្នែកសិល្បៈចម្រៀង សូម្បី តែកាយវិការ ការលើកដាក់សំនៀង ក៏ ស៊ីសង្វាក់ទៅនឹងអត្ថន័យបទចម្រៀងថែម ទៀត ។
លោក ឡុង សេងអួន បានរំលឹកថា ខ្ញុំក៏មិននឹកស្មានថា ចៅស្រី រិទ្ធ សូនីតា មានទេពកោសល្យផ្នែកសិល្បៈចម្រៀង ដែរ ពីព្រោះម្ដាយរបស់គេក៏ដូចជាឪពុក ដែលបែកបាក់គ្នានោះ មិនមែនជាអ្នកសិល្បៈ ដូច្នេះនេះគឺឧបនិស័យរបស់នាង ដែលមានពីកំណើត គួបផ្សំនឹងម្ដាយមីង ដែលជាកូនរបស់ខ្ញុំ ឡុង សុជាតា ចេះច្រៀង ហើយមានកម្មវិធីម្ដងៗយកនាង ទៅតាមនោះ ទើបរូបគេចេះបទចម្រៀង សម័យដើមជាច្រើន ។
លោក ឡុង សេងអួន បានរំលឹកថា ខ្ញុំក៏មិននឹកស្មានថា ចៅស្រី រិទ្ធ សូនីតា មានទេពកោសល្យផ្នែកសិល្បៈចម្រៀង ដែរ ពីព្រោះម្ដាយរបស់គេក៏ដូចជាឪពុក ដែលបែកបាក់គ្នានោះ មិនមែនជាអ្នកសិល្បៈ ដូច្នេះនេះគឺឧបនិស័យរបស់នាង ដែលមានពីកំណើត គួបផ្សំនឹងម្ដាយមីង ដែលជាកូនរបស់ខ្ញុំ ឡុង សុជាតា ចេះច្រៀង ហើយមានកម្មវិធីម្ដងៗយកនាង ទៅតាមនោះ ទើបរូបគេចេះបទចម្រៀង សម័យដើមជាច្រើន ។
កុមារី រិទ្ធ សូនីតា មានម្ដាយឈ្មោះ ឡុង សេរីរដ្ឋា អាយុ៣៥ឆ្នាំ និងឪពុក ឈ្មោះ រ័ត្ន សុវណ្ណរិទ្ធ អាយុ៣៦ឆ្នាំ ដែល បច្ចុប្បន្ននេះ អ្នកទាំង២មិនដឹងជារស់នៅ ទីណាពិតប្រាកដ បន្ទាប់ពីពួកគាត់បាន បោះបង់ សូនីតា ឱ្យរស់នៅរងារឯកោជា មួយជីតា មុខរបរជាកម្មករជាងផ្ទះ ប៉ុន្ដែ ពេលនេះ នាងទទួលបាននូវការគាំទ្រយ៉ាង ច្រើនពីទស្សនិកជន ដែលសង្ឃឹមថា នឹង មានសប្បុរសជនក៏ដូចជាអ្នកស្រឡាញ់ វិស័យសិល្បៈ នឹងជួយឧបត្ថម្ភក៏ដូចជា លើកស្ទួយពីជីវភាពរស់នៅប្រចាំថ្ងៃ ដើម្បីឱ្យនាងមានឱកាសសិក្សាបានចប់ នៅក្នុងត្រកូលដែលជួបប្រទះភាពខ្វះខាតនេះ ៕
ប្រភពៈ នគរវត្ត
No comments:
Post a Comment