ក្រុងម៉ាកាវ: Manny Pacquiao បានធ្វើការឧទ្ទិសការប្រកួតដណ្តើមខ្សែក្រវាត់ពិភពលោកនៅថ្ងៃអាទិត្យនេះជាមួយនឹងកីឡាករ Brandon Rios ទៅឲ្យប្រជាជនហ្វីលីពីន តាមរយៈការប្រកាសកាលពីថ្ងៃពុធថា៖ «ការប្រដាល់នេះគឺសម្រាប់អ្នកទាំងអស់គ្នា»។កីឡាករប្រដាល់ របស់ហ្វីលីពីនរូបនេះបានប្រាប់សន្និសីទសារព័ត៌មាននៅមុនការ ប្រដាល់ដណ្តើមខ្សែក្រវាត់ពីស្ថាប័នអង្គភាពកីឡាប្រដាល់ពិភពលោក ហៅកាត់ថា WBO ក្នុងទម្ងន់មធ្យម (ពី៦៣,៥ ទៅ៦៧គីឡូក្រាម) នៅទីក្រុងម៉ាកាវថា អារម្មណ៍របស់គេបានស្ថិតនៅជាមួយប្រជាជនរបស់គេ ខណៈដែលពួកគេព្យាយាមស្តារឡើងវិញក្រោយពីខ្យល់ព្យុះសង្ឃរាហៃយ៉ានដ៏ កាចសាហាវ បានវាយប្រហារហ្វីលីពីនកាលពីថ្ងៃទី៨ ខែវិច្ឆិកា កន្លងទៅ។
បុរសមានរហស្សនាមថា Pacman រូបនេះ ដែលបានគ្រប់គ្រងខ្សែក្រវាត់ពិភពលោកចំនួន៨ក្នុងប្រភេទទម្ងន់ ខុសៗគ្នា បាននិយាយថា៖ «ខ្ញុំនឹងព្យាយាមឲ្យអស់ពីលទ្ធភាពដើម្បីឈ្នះការប្រកួតនេះ និងដើម្បីផ្តល់ឲ្យមានការប្រកួតដ៏ល្អ ជាពិសេសជាមួយនឹងអ្វីដែលបានកើតឡើងចំពោះប្រជាជនរបស់ខ្ញុំ»។
Pacquiao និង Rios បានបង្ហាញពីការគោរពគ្នាទៅវិញទៅមកដ៏អស្ចារ្យអំឡុងសន្និសីទ សារព័ត៌មាន ដែលមានលក្ខណៈផ្ទុយគ្នាស្រឡះទៅនឹងគ្រូបង្វឹករៀងៗខ្លួនរបស់ពួកគេ ដែលបានប៉ះទង្គិចសម្តីគ្នានៅកន្លែងហ្វឹកហាត់នៅឯរមណីយដ្ឋាន Venetian Macau កាលពីថ្ងៃពុធ។
កីឡាករ Pacquiao បាននិយាយប្រាប់ឲ្យដឹងទៀតថា៖ «រាល់អ្វីដែលខ្ញុំអាចនិយាយគឺថា ក្រុមទាំងពីរបានត្រៀមលក្ខណៈល្អសម្រាប់ការប្រកួតនេះដូចគ្នា។ វានឹងស្រាយបញ្ជាក់នៅលើសង្វៀន ហើយមិនមែនលើពាក្យសម្តីនៅមុនការប្រកួតឡើយ។ សូមរង់ចាំមើលនូវគំរូដ៏ល្អទៅកាន់អ្នកដែលស្ងើចសរសើរកីឡា ប្រដាល់»។
កម្មវិធីប្រកួតដែលមានឈ្មោះថា Clash in Cotai មួយនេះ នឹងត្រូវចាប់ផ្តើមនៅវេលាម៉ោង៩ព្រឹក (ម៉ោងនៅកម្ពុជា) នាព្រឹកថ្ងៃអាទិត្យ៕ IS
ប្រភពៈ ភ្នំពេញប៉ុស្តិ៍
No comments:
Post a Comment