ខេត្តកំពង់ឆ្នាំង ៖
អាវុធគ្រប់ប្រភេទជាច្រើនដើមត្រូវមន្ត្រីប៉ូលិសខេត្ត
និង ស្រុកស្រាវជ្រាវរកឃើញ កាលពីព្រឹកថ្ងៃទី១៤ វិច្ឆិកា
២០១៣ នៅលើភ្នំដ៏ឆ្ងាយមួយក្នុងភូមិសាស្ត្រស្រុកទឹកផុស
តាមរយៈការផ្តល់ដំណឹងពីប្រជាពលរដ្ឋដែលឡើងភ្នំកាប់ឈើ ។
ប្រជាពលរដ្ឋបានរាយការណ៍ជូនលោកអភិបាលស្រុកទឹកផុស
និងបន្តជូនលោកអភិបាលខេត្ត
ហើយក៏ចាត់បញ្ជាមន្ត្រីប៉ូលិសទៅរុករកឃើញ
ដូចការប្រាប់របស់ប្រជាពលរដ្ឋមែន ។
ទោះជាយ៉ាងណាក្តី ការរុករកប្រទះឃើញនេះ
គ្រាន់តែបានរាយការណ៍ជូនត្រឡប់ទៅលោក អភិបាលស្រុក
និងបន្តរាយការណ៍ជូនលោកអភិបាលខេត្តវិញប៉ុណ្ណោះ
ព្រោះនៅឆ្ងាយពេក និងមិនទាន់មានលទ្ធភាពដឹកជញ្ជូនយកមកទុក
។ លោកសោម វុឺន អភិបាលស្រុកទឹកផុស ប្រាប់តាមទូរស័ព្ទថា
លោកបានទទួលដំណឹងពីប្រជាពលរដ្ឋឡើងភ្នំថាបានប្រទះឃើញអាវុធ
ជាច្រើនដើមនៅលើភ្នំមួយ ប៉ុន្តែមិនស្គាល់ឈ្មោះភ្នំអ្វីទេ
ខ្លះថាភ្នំដោះក្រមុំ តែខ្លះថាឈ្មោះផ្សេងទៅវិញ ។
ក្រោយមកលោកបានជូនដំណឹងនេះទៅលោកអភិបាលខេត្ត
និងលោកស្នងការនគរបាលខេត្ត ហើយក៏ឱ្យកម្លាំងប៉ូលិស
និងប្រជាពលរដ្ឋជូនទៅទីតាំងកាំភ្លើងទាំងនោះ
ដោយចំណាយពេល២ថ្ងៃទើបប្រទះឃើញ ។ នៅម៉ោងប្រហែល១០ព្រឹក
ថ្ងៃទី១៤ វិច្ឆិកា ក្រុមសមត្ថកិច្ចបានទូរស័ព្ទប្រាប់ថា
រកឃើញហើយ គឺនៅឆ្ងាយខ្លាំងណាស់ គ្មានសេវាទូរស័ព្ទទេ
ទម្រាំរកកន្លែងមានសេវាបានទើបទូរស័ព្ទប្រាប់ ។
ប្រភពដដែលបន្តថា
តាមសេចក្តីរាយការណ៍ពីលោកអធិការស្រុក កាំភ្លើងដែលរកឃើញនោះ
មានច្រើនដើមណាស់
គ្រាន់តែប្រមូលយកផ្នែកខាងលើមានចំនួនជាង១០០ដើម
ក្នុងនោះមានកាំភ្លើង AK,
CKC, B40 និង RPD ជាដើម ។
ប៉ុន្តែនៅសល់ជាច្រើនរយដើមទៀតដែលពុំទាន់យកចេញបាន
ព្រោះនៅកប់ខាងក្រោមច្រើនស្រទាប់ទៀត ។
លោកឧត្តមសេនីយ៍ត្រី អាត់ ខែម ស្នងការនគរបាលខេត្ត
មានប្រសាសន៍ថា ក្រោយពីទទួលព័ត៌មាននោះ
លោកចាត់ឱ្យមន្ត្រីប៉ូលិសខេត្ត-ស្រុក
និងមន្ត្រីប៉ូលិសជំនាញអាវុធជាតិផ្ទុះ ជិត២០នាក់
ទៅកាន់ទីតាំងអាវុធនោះ ដែលមានចម្ងាយជាង៨០គីឡូម៉ែត្រ
ពីទីរួមស្រុកទឹកផុស ជាតំបន់ជួរភ្នំដោះក្រមុំ ។
ក្រុមមន្ត្រីប៉ូលិសទាំងនោះ ដើរ១យប់២ថ្ងៃទើបទៅដល់
ព្រោះភូមិសាស្ត្រមានការលំបាកខ្លាំងណាស់
ឡើងភ្នំចុះភ្នំជាច្រើនស្រទាប់ ។ លោកស្នងការបញ្ជាក់ថា
អាវុធទាំងនោះខូចគុណភាពស្ទើរទាំងស្រុងទៅហើយ
មិនដឹងបន្សល់ទុកតាំងពីសម័យណាទេ
ប៉ុន្តែពេលនេះបានផ្អាកកាយយកជាបណ្តោះអាសន្នសិន
ព្រោះក្នុងនោះមានសល់គ្រាប់ច្រើន ។
លោកឈួរ ច័ន្ទឌឿន
អភិបាលខេត្តមានប្រសាសន៍ប្រាប់សារព័ត៌មានកោះសន្តិភាពថា
ពេលនេះប៉ូលិសកំពុងស្ថិតនៅទីតាំងអាវុធទាំងនោះ
ហើយការទាក់ទងគ្នាលំបាកណាស់ ។
ពេលនេះកំពុងរង់ចាំទទួលរូបថតពីក្រុមសមត្ថកិច្ច
ដើម្បីយកពិនិត្យមើល និងវាយតម្លៃ ៕
ប្រភពៈ កោះសន្តិភាព
No comments:
Post a Comment