និស្សិតខ្មែរមួយរូប ដែលអះអាងថាជានិស្សិតឆ្នាំទី ៣
ផ្នែកកុំព្យូទ័រវិទ្យានៅសាកលវិទ្យាល័យន័រតុន
បានស្រាវជ្រាវដោយបានបង្កើតកម្មវិធីដ៏ទំនើបមួយ ដែលអាចបញ្ជាបិទបើកអំពូលភ្លើងតាមរយៈទូរសព្ទដៃ។កម្មវិធីនេះមានឈ្មោះថា Smart Lamp ត្រូវគេបង្ហោះនៅលើបណ្តាញសង្គម Facebook ហើយដែលទទួលការគាំទ្រនិងកោតសរសើរយ៉ាងខ្លាំងពីមិត្តអ្នកកម្សាន្ត លើស្នាដៃបង្កើតនេះ ហើយក៏មានការ Share និង Like ជាច្រើនផងដែរ។
តាមរយៈការសាកសួរទើបដឹងថា ជាស្នាដៃរបស់និស្សិតនៅសាកលវិទ្យាល័យន័រតុន ដែលបានរៀបចំធ្វើគម្រោងមួយនេះ សម្រាប់ចូលរួមពិព័រណ៍ស្នាដៃនិស្សិតនាពេលកន្លងមក។
លោក ភឿក គោវិទ្ធ Database Developer នៅសាកលវិទ្យាល័យន័រតុន និងដែលជាអ្នកដឹកនាំគម្រោងបង្កើតកម្មវិធីបញ្ជា បិទបើកអំពូលភ្លើងតាមទូរសព្ទនេះបានបញ្ជាក់ថា៖ “ជាការពិតកម្មវិធីនេះមានឈ្មោះថា Smart Lamp ដែលជាគម្រោងនិងជាគំនិតបង្កើតរបស់និស្សិតន័រតុនមួយក្រុម ក្នុងពេលដែលពួកគេចូលរួមក្នុងពិព័រណ៍ស្នាដៃនិស្សិតនាពេលកន្លង មក”។
លោកបញ្ជាក់ថា និស្សិតទាំងនោះបានលើកពីគម្រោងក្នុងការបង្កើតកម្មវិធី Smart Lamp ដែលអាចបញ្ជាបិទបើកអំពូលពីចម្ងាយពី Smartphone តាមរយៈ Wireless ដើម្បីដោះស្រាយបញ្ហាពិបាកៗមួយចំនួននៅក្នុងការរស់នៅ។
លោកថា តាមរយៈការលើកឡើងរបស់ពួកគេ លោកក៏មានការចាប់អារម្មណ៍និងដោយទទួលបានការគាំទ្រពី សាកលវិទ្យាល័យ ទើបបានដឹកនាំធ្វើឲ្យគម្រោងនេះសម្រេចបានជោគជ័យ។
លោកបញ្ជាក់ថា Smart Lamp មានសមត្ថភាពក្នុងការគ្រប់គ្រងប្រព័ន្ធអំពូលភ្លើងនៅក្នុងគេហដ្ឋាន ទាំងមូល ដោយអាចបញ្ជាបិទបើកអំពូលពីចម្ងាយដោយប្រើប្រាស់ Smartphone តាមរយៈ Wireless។ “ក្នុងការបញ្ជាបិទឬបើក យើងអាចចុចលើប៊ូតុង តាមលេខអំពូលមួយៗ ឬបញ្ជាដោយប្រើសំឡេងក៏បាន។ លើសពីនេះក៏អាចកំណត់ពេលឲ្យអំពូលបិទ ឬបើកទៅតាមពេលវេលាកំណត់។ ជាពិសេសក៏អាចធ្វើឲ្យអំពូលមានពន្លឺតិចឬខ្លាំងផងដែរ”។
លោកបានបន្តទៀតថា ទោះបីជាកម្មវិធីនេះ មិនមែនជាកម្មវិធីចាំបាច់សម្រាប់ជីវិតរស់នៅក្តី ប៉ុន្តែវាបានឆ្លុះបញ្ចាំងពីជីវភាពរស់នៅពោរពេញទៅដោយបច្ចេកវិទ្យា ទំនើប និងទាន់សម័យស្របទៅនឹងពិភពលោកបច្ចុប្បន្ន។ លើសពីនេះ គឺជាការចូលរួមសន្សំសំចៃថាមពលអគ្គិសនី តាមរយៈការបង្កភាពងាយស្រួលក្នុងការបិទបើកភ្លើង នៅពេលដែលអ្នកប្រើប្រាស់ភ្លេច ឬពិបាកក្នុងការដើរទៅបិទពេលឈប់ត្រូវការប្រើប្រាស់។
លោកថា ការបង្កើតគម្រោងនេះបានជោគជ័យត្រូវការចំណាយសិក្សានិងស្រាវជ្រាវ ជិត ២ ខែ។ ទៅថ្ងៃខាងមុខលោកបញ្ជាក់ថា លោកមានគម្រោងឲ្យវាអាចដំណើរការដោយ SMS នៅលើទូរសព្ទដែលនឹងជួយកាត់បន្ថយ និងផ្តល់ភាពងាយស្រួលសម្រាប់ការប្រើប្រាស់បន្ថែមទៀត។
ប្រភពៈ sabay
No comments:
Post a Comment