ភ្នំពេញៈ ក្នុងរយៈពេល ៩ខែ ឆ្នាំ ២០១៣ នេះ ក្រសួង
កសិកម្មរុក្ខាប្រមាញ់ និងនេសាទ បានបង្ក្រាបបទល្មើសព្រៃឈើសត្វព្រៃ
និងបទល្មើសកាប់រានទន្ទ្រានដីព្រៃចំនួន ១០៤៧ ករណី។
ក្រុមអង្គការសង្គមស៊ីវិល ដែលធ្វើការពាក់ព័ន្ធនឹងវិស័យព្រៃឈើ
បានហៅចំនួនតួលេខដែលក្រសួងបានបង្ក្រាបនេះថា
គ្រាន់តែជាផ្នែកនៃជ្រុងតូចមួយប៉ុណ្ណោះ ខណៈដែលការកាប់បំផ្លាញ
និងការដឹកជញ្ជូនឈើ បានកើតឡើងជាប្រព័ន្ធយ៉ាងពេញបន្ទុក។នៅក្នុងរបាយការណ៍ ស្តីពីសភាពការណ៍កសិកម្ម រុក្ខាប្រមាញ់ និងនេសាទ ប្រចាំ ៩ខែ ឆ្នាំ ២០១៣ ដែលចេញផ្សាយកាលពីថ្ងៃ ទី៧ ខែ វិច្ឆិកា ដែល ភ្នំពេញ ប៉ុស្តិ៍ ទើបទទួលបានកាលពីម្សិលមិញ បានបង្ហាញថា ក្នុងរយៈពេល ៩ខែ ឆ្នាំ ២០១៣ នេះ ក្រសួង កសិកម្ម បានបង្ក្រាបបទល្មើសព្រៃឈើសត្វព្រៃ និងបទល្មើសកាប់រានទន្ទ្រានដីព្រៃសរុបចំនួន ១០៤៧ ករណី ឃាត់ខ្លួនជនជាប់ចោទ និងដកហូតវត្ថុតាង មានដូចជា ឈើហ៊ុបមូលចម្រុះគ្រប់ប្រភេទ
ចំនួន ២៨៧ ម៉ែត្រគុប ឈើអារចំនួន ៣៤០៦ ម៉ែត្រគុប ឈើក្រាក់គ្រញូងចំនួន ១០៦ ម៉ែត្រគុបនិង ២៤៣២ គីឡូក្រាម ពកធ្នង់ចំនួន ១៣០ គីឡូក្រាមជ័រទឹកចំនួន ៥០០០ គីឡូក្រាម សត្វព្រៃចម្រុះគ្រប់ប្រភេទចំនួន ៦៥២ គីឡូក្រាម និង ៣៥០ ក្បាល រថយន្តចំនួន ៣៨៩ គ្រឿង ត្រាក់ទ័រចំនួន ១៣ គ្រឿង ម៉ូតូ ១០៣ គ្រឿង គោយន្ត ១៩ គ្រឿង រទេះកង់ឡានចំនួន ២៦ គ្រឿង ម៉ាស៊ី ន ផ្សេងៗ ២៩ គ្រឿង រណារយន្តចំនួន ៤០ គ្រឿង និងពិន័យជាប្រាក់បានចំនួន ៨.០១០.៣៥៩ រៀលព្រមទាំងដកហូតដីព្រៃឈើបានចំនួន ២៤១៣ ហិកតា។
របាយការណ៍នេះបានឲ្យដឹងទៀតថា៖ «ចំណូលពីផលព្រៃឈើចូលថវិកាជាតិសរុបចំនួន ៤៣.៤៦៣.៥៥៣.៨៩៥ រៀល ដែលក្នុងនោះ ចំណូលបានមកពីផលទុនពីការលក់-ជួលទ្រព្យសម្បត្តិ និងសេវា ចំនួន ៣៥.៤៤៤.៣៩៤.៦៥៨ រៀល និងចំណូលពីការ ផាកពិន័យឈើដែលបានបង្ក្រាបបទល្មើសចំនួន ៨.០១០.៣៥៩.២៣៧ រៀល»។
នៅក្នុងរបាយការណ៍នោះ បានដាក់ទិសដៅពង្រឹងការអនុវត្តច្បាប់ ស្តីពីព្រៃឈើ និងបទបញ្ជារបស់រដ្ឋាភិបាលលេខ ០១ និង ០២ និងកំណត់តំបន់ព្រៃឈើរេចរិលឲ្យបានច្បាស់ ដើម្បីធ្វើការស្តារព្រៃឈើឡើងវិញឲ្យក្លាយជាតំបន់ព្រៃឈើមាន តម្លៃពាណិជ្ជកម្ម ដោយធ្វើការដាំដុះប្រភេទឈើប្រណីតមានតម្លៃ និងថែរក្សាការពារចម្ការព្រៃពូជ ព្រមជាមួយនិងការប្រមូលពូជឈើ។
លោក អ៊ុក រ៉ាប៊ុន រដ្ឋមន្ត្រីក្រសួង កសិកម្ម ដែលជាអ្នកចុះហត្ថលេខាលើរបាយការណ៍នេះ បានបដិសេធពុំធ្វើការអត្ថាធិប្បាយឡើយកាលពីម្សិលមិញ ដោយមានប្រសាសន៍ថា លោកកំពុងរៀបចំឡើងយន្តហោះ។ ចំណែកលោក ទឹម ស៊ីផា ប្រធាននាយកដ្ឋាននីតិកម្ម និងពង្រឹងការអនុវត្តច្បាប់នៃក្រសួងនេះក៏បានបដិសេធពុំ ធ្វើការអត្ថាធិប្បាយដែរដោយថ្លែងថា កំពុងជាប់រវល់។
លោក ថន សារ៉ាត ប្រធាននាយកដ្ឋានរដ្ឋបាលនៃក្រសួង កសិកម្ម បានឲ្យដឹងថា សមត្ថកិច្ចតែងតែឃាត់ខ្លួនជនប្រព្រឹត្តបទល្មើសព្រៃឈើ បញ្ជូនទៅតុលាការ ហើយការសម្រេចយ៉ាងណានោះគឺជានីតិវិធីរបស់តុលាការ។ លោកបញ្ជាក់ថា៖ «យើងបង្ក្រាបមិនថា តូច រឺធំនោះទេ ប៉ុន្តែ ក្រុមហ៊ុនគេមានឯកសារស្របច្បាប់»។
កាលពីថ្ងៃ ទី២២ ខែ កុម្ភៈ ឆ្នាំ ២០១៣ លោកនាយករដ្ឋមន្ត្រី ហ៊ុន សែន បានចុះហត្ថលេខាលើបទបញ្ជា ០២ បប ស្តីពីវិធានការបង្ការទប់ស្កាត់ និងបង្រ្កាបការកាប់ការដឹកជញ្ជូន ការប្រមូល ការស្តុកទុក និងការនាំឈើក្រញូងចេញ ដោយសម្រេចលើ ៩ ចំណុច ដែលនៅក្នុងចំណុច ទី១ ក្នុងកថាខណ្ឌ ទី២ បានលើកឡើងថា ករណីមានការឆ្លងដែនខុសច្បាប់ក្នុងភូមិសាស្ត្រឈរជើងរបស់អង្គភាព ណាមួយ មេបញ្ជារការអង្គភាពនោះ ត្រូវមានការទទួលខុសត្រូវ ចំពោះមុខរាជរដ្ឋាភិបាល។
ប៉ុន្តែក្រុមអ្នកឃ្លាំមើលធនធានធម្មជាតិ បានរាយការណ៍ថា ការកាប់បំផ្លាញ និងការដឹកជញ្ជូនឈើ នៅតែបន្តកើតឡើងយ៉ាងគគ្រឹកគគ្រេងដដែល។
កាលពីថ្ងៃ ទី២១ ខែ កញ្ញា កន្លងមកក្រុមសកម្មជនការពារព្រៃឈើមានសម្ព័ន្ធសហគមន៍កសិករកម្ពុជា និងបណ្តាញយុវជនកម្ពុជា បានចេញសេចក្តីថ្លែងការណ៍រួមមួយដោយលើកឡើងថា យ៉ាងហោចណាស់ ក៏មានក្រុមហ៊ុនឯកជនដែលទទួលបានដីសម្បទានសេដ្ឋកិច្ចពី រដ្ឋាភិបាលជាង ១២ ក្រុមហ៊ុន និងក្រុមឈ្មួញជាច្រើនបានកាប់បំផ្លាញព្រៃឈើ និងដឹកជញ្ជូនឈើប្រណីត យ៉ាងអនាធិបតេយ្យនៅក្នុងខេត្តចំនួន ៩ ដោយចំហ គ្មានការបង្រ្កាប និងទប់ស្កាត់ពីសំណាក់សមត្ថកិច្ចឡើយ ជាពិសេសនៅក្នុងអំឡុងមុនពេល និងក្រោយពេលបោះឆ្នោត ជ្រើសតាំងតំណាងរាស្ត្រនីតិកាល ទី៥។
លោក ឈឹម សាវុធ មន្ត្រីស្រាវជ្រាវជាន់ខ្ពស់ របស់មជ្ឈមណ្ឌលសិទ្ធិកម្ពុជា ដែលធ្វើការយ៉ាងសកម្ម ឃ្លាំមើលការកាប់បំផ្លាញព្រៃឈើជាមួយនិងប្រជាសហគមន៍ នៅតាមបណ្តាខេត្តជាច្រើន បានថ្លែងថា របាយការណ៍របស់ក្រសួង កសិកម្ម គ្រាន់តែបង្ហាញមួយជ្រុងតូចប៉ុណ្ណោះ ដែលថា ក្រសួងបានបង្ក្រាបបទល្មើសព្រៃឈើ ពីព្រោះក្រសួងបង្ក្រាបតែឈើដែលដឹកតាមរទេះគោ រឺក៏ម៉ូតូប៉ុណ្ណោះ ប៉ុន្តែពុំដែលចេញមុខបង្ក្រាបរថយន្តធំៗ ដែលដឹកឈើនោះទេ ដោយសំអាងថា ក្រុមហ៊ុនស្របច្បាប់។
លោកបញ្ជាក់ថា បច្ចុប្បន្ន ការកាប់បំផ្លាញព្រៃឈើ គឺកំពុងកើតឡើងយ៉ាងអនាធិបតេយ្យ និងមានលក្ខណៈជាប្រព័ន្ធ។ លោកបានឲ្យដឹងទៀតថា៖ «ការដែលមានករណីបង្ក្រាបកន្លងមក គឺដោយសារតែមិនត្រូវរ៉ូវគ្នាក្នុងការឲ្យលុយទៅសមត្ថកិច្ច ហើយក៏គ្រាន់តែជាទង្វើបិទបាំងនូវអ្វីដែលកំពុងតែកើតឡើងតែ ប៉ុណ្ណោះ»។
ចំណែកលោក អ៊ូច ឡេង ប្រធានអង្គការក្រុមកិច្ចការពិសេសសិទ្ធិមនុស្សកម្ពុជាបានចោទ ជាសំណួរថា នៅក្នុងរបាយការណ៍របស់ក្រសួងកសិកម្ម បានបង្ហាញថា បង្ក្រាបបទល្មើសជាង ១០០០ ករណី ហេតុអ្វីក៏លុយបានមកពីការបង្ក្រាប មានចំនួនតិចហើយតើឈើដែលបានបង្ក្រាបនោះយកទៅណា? ប្រសិនបើក្រសួងលក់ឲ្យទៅក្រុមហ៊ុន គឺមានន័យថា ឃុបឃិតជាមួយក្រុមហ៊ុន ដើម្បីកាប់ឈើហើយក៏ជាការផ្តល់មធ្យោបាយជួយសម្រួលដល់ក្រុមហ៊ុនផង ដែរ។
លោកបញ្ជាក់ថា៖ «ការកាប់បំផ្លាញព្រៃឈើគឺពុំមែនប្រជាពលរដ្ឋតូចតាចជាអ្នកកាប់ នោះទេប៉ុន្តែគឺក្រុមហ៊ុនដែលទទួលបានដីសម្បទានសេដ្ឋកិច្ច ដូច្នេះរដ្ឋាភិបាលគួរតែចាត់វិធានការចំពោះក្រុមហ៊ុនទាំងអស់នោះតាម ផ្លូវច្បាប់ មិនមែនបង្ក្រាបតែលើប្រជាពលរដ្ឋតូចតាចនោះទេ»៕
ប្រភពៈ ភ្នំពេញប៉ុសិ៍្ត
No comments:
Post a Comment