ខេត្តកំពង់ចាម ៖ នៅសាលប្រជុំនៃស្នងការដ្ឋាននគរបាលខេត្តកំពង់ចាមព្រឹកថ្ងៃទី២១
ខែវិច្ឆិកា ឆ្នាំ២០១៣មានបើកកិច្ចប្រជុំបូកសរុបលទ្ធផលការងារ
បង្ក្រាបបទល្មើសគ្រឿងញៀនឆ្នាំ២០១៣និងលើកទិសដៅឆ្នាំ២០១៤ក្រោម
វត្តមានលោកឧត្តមសេនីយ៍ទោ ឆាយ គឹមសុន ស្នងការនគរបាលខេត្ត លោក
ហួត វុទ្ធី ព្រះរាជអាជ្ញាអមសាលាដំបូងខេត្ត លោក ប្លង់ សុផល
ព្រះរាជអាជ្ញារងអមសាលាដំបូងខេត្ត ។ក្នុងឱកាសបើកអង្គពិធីលោក ឧត្តមសេនីយ៍ ឆាយ គឹមសុន បានមានប្រសាសន៍ក្រើនរំលឹកដល់មន្ត្រីនគរបាលប៉ុស្តិ៍ទូទាំងខេត្ត ត្រូវបន្តអនុវត្តការងារបង្ការបង្ក្រាបគ្រឿងញៀនក្នុងមូលដ្ឋាន របស់ខ្លួនឲ្យបានប្រសើរ ដោយយកចិត្តទុកដាក់បំផុតដើម្បីឆ្លើយតបនឹងគោលនយោបាយភូមិ-ឃុំមាន សុវត្ថិភាពរបស់រាជរដ្ឋាភិបាល ។ នាឱកាលនោះលោកក៏បានមានប្រសាសន៍ក្នុងនាមថ្នាក់ដឹកនាំនគរបាលជាតិ ថា ខ្ញុំសូមថ្លែងអំណរគុណដល់មន្ត្រីនគរបាលទាំងអស់ទូទាំងខេត្តដែល កន្លងមកបានយកចិត្តទុកដាក់ទាំងកម្លាំងកាយនិងកម្លាំងចិត្តក្នុង ការការពារសន្តិសុខ និងសណ្តាប់ធ្នាប់ជូនប្រជាពលរដ្ឋទូទៅក្នុងខេត្តកំពង់ចាម ។
ក្នុងរបាយការណ៍របស់ការិយាល័ ប្រឆាំងគ្រឿងបានឲ្យដឹងថា ចំពោះការប្រើប្រាស់គ្រឿងញៀនឆ្នាំ២០១៣នេះមានអ្នកប្រើប្រាស់ថ្នាំ ញៀនដោយចាក់នឹងម្ជុលសឺរាំង មានការប្រើប្រាស់រហូតដល់មូលដ្ឋានភូមិ-ឃុំដាច់ស្រយាលមួយចំនួន ក្នុងនោះកម្លាំងនគរបាលជំនាញបានបង្ក្រាបចំនួន៦៤ករណី,ចាប់ខ្លួន១៣១ នាក់ ស្រី១៨នាក់, បង្ក្រាបតាមការស្រាវជ្រាវចំនួន៥៣ករណី ចាប់ខ្លួន៩៦នាក់ ស្រី១២នាក់, បង្ក្រាបតាមដីកាចំនួន៥ករណី ចាប់ខ្លួន៥នាក់ ស្រី១នាក់ ។ បង្ក្រាបឃាត់ខ្លួនអប់រំចំនួន៦ករណី, ចាប់ខ្លួនចំនួន៣០នាក់ ស្រី៥នាក់ និងរឹបអូសវត្ថុតាងថ្នាំញៀនក្រាមពណ៌សចំនួន២៥២កញ្ចប់, ថ្នាំគ្រាប់ចំនួន១៥គ្រាប់ ទម្ងន់សរុបចំនួន១៣៩,៣៣៦ក្រាម, ជញ្ជីងអេឡិចត្រូនិចចំនួន៤គ្រឿង, បញ្ជូនទៅមជ្ឈមណ្ឌលកែប្រែចំនួន១២នាក់ ។ ក្នុងនោះអាជ្ញាធរជំនាញចូលរូមផ្សព្វផ្សាយច្បាប់ស្តីពីផលប៉ះពាល់ នៃគ្រឿងញៀនជូនដល់ប្រជាពលរដ្ឋ មន្ត្រីរាជការនិងកងកម្លាំងប្រដាប់អាវុធតាមសហគមន៍និងស្រុក ក្រុងចំនួន១៧បានចំនួន១៧លើក មានអ្នកចូលរួមចំនួន១៥១១៦នាក់ ស្រី១១៩៧៧នាក់ ។
ការិយាល័យប្រឆាំងគ្រឿងញៀនក៏បាន លើកទិសដៅបន្តសម្រាប់ឆ្នាំ២០១៤ ជំរុញការអនុវត្តផែនការលេខ០៥២ ចុះថ្ងៃទី២១ ខែសីហា ឆ្នាំ២០០៦ របស់អគ្គស្នងការនគរបាលជាតិ ឲ្យបានដល់មូលដ្ឋានភូមិ ឃុំទូទាំងខេត្តនិងបន្តពង្រឹងសមត្ថភាពជំនាញដល់មន្ត្រីអនុវត្ត ច្បាប់គ្រឿងញៀន ជំរុញការស្រាវជ្រាវរកព័ត៌មានចុងក្រោយនៃដីកាដែលសេសសល់ និងចាត់វិធានការចាប់បង្ក្រាបនិងគ្រប់គ្រងមុខសញ្ញាដោះលែងពី ពន្ធនាគារ ។ ជំរុញការគ្រប់គ្រងមុខសញ្ញាការប្រើប្រាស់ថ្នាំញៀនឲ្យបានស៊ីជម្រៅ បន្តផ្សព្វផ្សាយច្បាប់ផលប៉ះបាល់ដោយគ្រឿងញៀនឲ្យបានច្រើនដល់ សហគមន៍មូលដ្ឋាន ។
សូមបញ្ជាក់ថា ស្នងការដ្ឋាននគរបាលខេត្តកំពង់ចាមដែលដឹកនាំដោយលោកឧត្តមសេនីយ៍ទោ ឆាយ គឹមសុន បើទោះបីជាពេលវេលាដែលលោកធ្វើជាស្នងការមានរយៈខ្លីយ៉ាងណាក៏ដោយក៏ ក្នុអាណត្តិរបស់លោកដឹកនាំកន្លងមកបានទទួលជោគជ័យគួរកោតស្ងប់ ស្ងែងជាទីបំផុត ក្នុងការការងារដឹកនាំការកសាងហេដ្ឋាចរនាសម្ព័ន្ធ អគារសាលប្រជុំ កន្លែងធ្វើការកន្លែងស្នាក់នៅប្រកបដោយភាពងាយស្រួលរបស់កងកម្លាំង ការដឹកនាំគ្រប់គ្រងកម្លាំងបានល្អ លោកសម្រេចការងារបានជោគជ័យរាល់ការងារការពារសន្តិសុខក្នុងពិធីធំៗ របស់ថ្នាក់ដឹកនាំរបស់រាជរដ្ឋាភិបាល ហើយគោរពបទបញ្ជាថ្នាក់លើយ៉ាងហ្មត់ចត់ផងដែរ ជាពិសេសការងារសន្តិសុខរបស់លោក ក្នុងការបង្ការបង្ក្រាបបទល្មើសព្រហ្មទណ្ឌធ្វើឲ្យសភាពការណ៍បទល្មើស ព្រហ្មទណ្ឌពីមូយឆ្នាំទៅមួយឆ្នាំមានការថយចុះគួរជាទីមោទនៈ ៕
ប្រភពៈ នគរវត្ត
No comments:
Post a Comment