ចាប់ខ្លួន ជនល្មើស រំលោភក្មេងស្រី អាយុ៨ឆ្នាំ រួចសម្លាប់ បំបិទមាត់

កំពង់ឆ្នាំង ៖ កាលពី វេលាម៉ោង ៣និង២០នាទី​ទៀបភ្លឺ ថ្ងៃទី២៧ ខែកុម្ភៈ ឆ្នាំ ២០១៥​​នេះ ជន​សង្ស័យ​ដែល បាន ចាប់រំលោភកុមារីម្នាក់ រួចសម្លាប់បំបិទ មាត់ ត្រូវបានកម្លាំងសមត្ថកិច្ច នគរបាល​ការិយា​ល័យ ព្រហ្មទណ្ឌ កំរិតធ្ងន់  របស់ ស្នងការដ្ឋាន នគរបាលខេត្ត ចាប់ខ្លួនបានហើយ នៅចំណុច​រនាល​ភេ ស្ថិតក្នុងភូមិកំពង់បាស្រូវ ឃុំព្រៃគ្រី ស្រុកជលគិរី  ខណៈ ដែលជននេះ បានគេចចូលព្រៃ សម្ងំលាក់​ ខ្លួន១យប់១ថ្ងៃ ។

នាយនគរបាលព្រហ្មទណ្ឌកំរិតធ្ងន់ នៃស្នងការដ្ឋានគរបាលខេត្ត លោក ឌុច ចំរើន បាននិយាថា ជន​សង្ស័យខាងលើនេះ មានឈ្មោះ សូ ស៊ីម អាយុ៤០ ឆ្នាំ ធ្លាប់មានប្រពន្ធច្រើន និងចុងក្រោយមក មានប្រពន្ធ កូន១ រស់នៅភូមិកំពង់បាស្រូវនេះ ។ លោកបានបន្តថា ក្រោយពីមានករណីចាប់រំលោភ​ក្មេង​ស្រី ហើយសម្លាប់បំបិទមាត់ និងធ្វើឲ្យមានការភ្ញាក់ផ្អើល នៅព្រឹកថ្ងៃទី ២៦ ខែកុម្ភៈ ឆ្នាំ២០១៥ លោកឧត្តមសេនីយត្រី ប្រាក់ វុឌ្ឍី ស្នងការនគរបាលខេត្ត បានដាក់បញ្ជាឲ្យលោកដឹកនាំកម្លាំង ចុះ​ស្រាវជ្រាវបន្ទាន់ ហើយបានប្រមូលព័ត៌មាន និងវត្ថុតាង ទើបឈានដល់កំណត់មុខសញ្ញា ដែល​បានរត់គេចខ្លួនចូលព្រៃ។ ដោយមានកិច្ចសហការល្អពីប្រជាពលរដ្ឋ បានដឹងថា ជនសង្ស័យ​ខាង​លើ កំពុងសម្ងំលាក់ខ្លួន នៅចំណុចរនាលភេ ពេលនោះ កម្លាំងរបស់លោក បានទៅព័ទ្ធចាប់​ខ្លួន​បាន នៅវេលាម៉ោង៣ទៀបភ្លឺ ថ្ងៃទី២៧ ខែកុម្ភៈនេះ ។

ជនសង្ស័យ នៅចំពោះមុខសមត្ថកិច្ចសារភាពថា  រូបគេពិតជាបានចាប់នាងរំលោភពិតមែន តែមិន​បានសម្លាប់នោះទេ តែទោះយ៉ាងនេះក្តី ក៏សមត្ថកិច្ចបានកសាងសំណុំរឿង បញ្ជូន​ទៅតុលា​ការ​តាម​នីតិវិធីច្បាប់ដែរ ។

សូមរំឭកថា កុមារីរងគ្រោះមាន ឈ្មោះ ស.ល.ណ អាយុ ៨ឆ្នាំ  មានទីលំនៅភូមិ កំពង់បាស្រូវ ត្រូវ​បានជនសង្ស័យខាងលើ ចាប់រំលោភ រួចសម្លាប់បំបិទមាត់ កាលពីយប់ ថ្ងៃទី២៥  ហើយ​ត្រូវ​បាន​ប្រទះឃើញ ធ្វើឲ្យមានការភ្ញាក់ផ្អើល នៅព្រឹកថ្ងៃទី ២៦  និងឈានដល់ការចាប់ឃាត់ខ្លួន ជន​ដៃដល់នៅព្រឹក ថ្ងៃទី២៧ ខែកុម្ភៈ ឆ្នាំ២០១៥ ៕

ជនសង្ស័យដែលត្រូវសមត្ថកិច្ចឃាត់ខ្លួនពីបទរំលោភក្មេងស្រីអាយុ៨ឆ្នាំ

ប្រភពៈ ដើមអំពិល