ខេត្តកោះកុង ៖ នៅទូទាំងខេត្ត
កោះកុង នរណាក៏បានដឹងពីសិទ្ធិអំណាច របស់លោកស័ក្តិ ៤ យឹម ផេង
ដែលកំពុងតែល្បីឈ្មោះ ក្នុងការប្រកបអាជីពរកស៊ីដឹកជញ្ជូន
ប្រេងសាំងនិងទំនិញគេចពន្ធតាមដែនសមុទ្រ ហើយបើនិយាយពីជំនាញ
គយ របស់លោក ប៉ាង វ៉ាន់ថន វិញសម្ងំកើបតែលុយ យកទៅច្រកហោប៉ៅ
ធ្វើមានធ្វើបានផ្ទាល់ខ្លួន មិនដែលហ៊ាន ហើបមាត់ពីបញ្ហានេះទេ
ដែលទាមទារឲ្យអង្គភាព ប្រឆាំងអំពើពុករលួយ
ស្រាវជ្រាវបញ្ហានេះឡើងវិញផង គឺយ៉ាងហោចណាស់អាចជួយ
ឲ្យមានកំណើននៃចំណូលថវិកាជាតិ
និងនាំយកមន្ត្រីខិលខូចពុករលួយទៅដាក់ទោសតាមច្បាប់។
សេចក្តីរាយការណ៍ពីខេត្តកោះកុងបានឲ្យដឹងថា
ក្នុងមួយថ្ងៃៗមានទូកដឹកប្រេងគេចពន្ធ ក៏ដូចជាទំនិញចម្រុះ
ត្រូវបានក្រុមឈ្មួញដឹកជញ្ជូនមកពីស្រុកសៀម ចូលទឹកដីខេត្តកោះកុង
តាមដែនសមុទ្រ យ៉ាងអនាធិបតេយ្យបំផុត គេមិនដែលឃើញជំនាញគយ របស់លោក ប៉ាង
វ៉ាន់ថន និងសមត្ថកិច្ចពាក់ព័ន្ធយកចិត្តទុកដាក់
បង្ក្រាបការរត់ពន្ធទំនិញខុសច្បាប់ទាំងនេះទេ។
មេឈ្មួញដ៏មានឥទ្ធិពលម្នាក់ឈ្មោះ យឹម ផេង ហៅរស្មី
ជាមន្ត្រីនគរបាលពាក់ស័ក្តិ៤ មានតួនាទីជានាយរងទទួលបន្ទុក
ផែនកណ្តាលយុត្តិធម៌ នៃស្នងការដ្ឋាននរគបាលខេត្តកោះកុង
បានក្លាយជាមេឈ្មួញធំជាងគេ ក្នុងការរកស៊ីនាំចូលប្រេងសាំងគេចពន្ធ
និងទំនិញចម្រុះតាមដែនសមុទ្រ យកមកលក់ចែកចាយនៅ ពាសពេញខេត្តកោះកុង
គ្មាននរណាហ៊ានហើបមាត់នោះទេ។
លោក យឹម ផេង បានបើកស្ថានីយ៍លក់ប្រេង គេចពន្ធដ៏ធំមួយកន្លែង
ស្ថិតនៅតាមដងផ្លូវជាតិលេខ៤៨
ដោយយកឈ្មោះក្រុមហ៊ុនប្រេងស្របច្បាប់មកធ្វើជាខែល
ប៉ុន្តែរឿងពិតគឺស្ថានីយ៍ប្រេងឥន្ធនៈមួយនោះ
លក់ចែកចាយប្រេងសាំងគេចពន្ធ ដែលលោក យឹម ផេង នាំចូលតាមដែនសមុទ្រ
ក្នុងមួយថ្ងៃៗរាប់ម៉ឺនលីត្រ ដោយដឹកជញ្ជូនតាមទូកធំៗ។
ក្រៅពីជំនួញនាំចូលប្រេងសាំងគេចពន្ធ គេដឹងថាលោក យឹម ផេង
ក៏មានពាក់ព័ន្ធនឹងការនាំចូលគ្រឿងទេស និងទំនិញចម្រុះមកពីស្រុកសៀម
យកមកលក់ចែកចាយលើទឹកដីខេត្តកោះកុង
ដោយមិនមានការបង់ពន្ធជូនរដ្ឋឲ្យបានត្រឹមត្រូវនោះទេ
គឺរាប់សិបឆ្នាំមកហើយ ដែលលោក យឹម ផេង រួមទាំងភរិយារបស់គាត់
បានក្លាយជាមេឈ្មួញរកស៊ីដឹកជញ្ជូន ទំនិញគេចពន្ធដ៏មានឥទ្ធិពល។
លោក យឹម ផេង តែងតែអួតអាងថា គាត់ជាមនុស្សស្អាតស្អំ
ហើយរឿងរកស៊ីដឹកទំនិញអីនោះ សូមសួរទៅប្រពន្ធគាត់។ ការលើកឡើង បែបនេះ
ធ្វើឲ្យមនុស្សជាច្រើនអស់សំណើចយ៉ាងខ្លាំង ព្រោះគេគិតឃើញថា
ប្រសិនបើគ្មានលោក យឹម ផេង ជាខ្នងបង្អែកភរិយារបស់គាត់
មិនអាចទៅប្រឡូកក្នុងអាជីព នាំចូលទំនិញគេចពន្ធ បំផ្លាញចំណូលថវិកាជាតិ
ច្រើនសន្ធឹកសន្ធាប់នោះទេ។ ដូច្នេះទោះជាលោក យឹម ផេង
ប្រឡូកក្នុងការរកស៊ី ដឹកជញ្ជូនទំនិញគេចពន្ធដោយផ្ទាល់
ឬគ្រាន់តែធ្វើជាខ្នងបង្អែក ឲ្យភរិយារបស់គាត់ គឺវាដូចតែគ្នាទេ
គ្មាននរណាហ៊ានប៉ះពាល់ឡើយ ដោយសារតែគេយោគយល់ ណាមួយលោក យឹម ផេង
ចេះបែងចែកផលប្រយោជន៍ខ្លះៗ
ឲ្យមន្ត្រីជំនាញនិងសមត្ថកិច្ចពាក់ព័ន្ធដទៃទៀត
ទើបការដឹកជញ្ជូនទំនិញគេចពន្ធ របស់គាត់អាចដំណើរការដោយរលូនល្អ។
សូម្បីតែលោកគយចល័ត ដែលប្រចាំការលើផ្ទៃសមុទ្រ
នៅចំណុចមាត់ច្រកប៉ាក់ខ្លង គឺលោក ឱម ស៊ីនួន និងលោក ម៉ៅ ទ័រ
រួមទាំងសមត្ថកិច្ចប្រចាំ ច្រកព្រំដែនទាំងនោះ សុទ្ធតែទទួលបានផលប្រយោជន៍
ពីអាជីពរកស៊ីនាំចូល ទំនិញគេចពន្ធរបស់លោក យឹម ផេង ទើបមិនដែលមាននរណា
ហ៊ានហើបមាត់សោះ។ ការនាំចូលទំនិញដោយគ្មាន
ការបង់ពន្ធត្រឹមត្រូវរបស់លោក យឹម ផេង និងភរិយារបស់គាត់
អាចដំណើរការទៅបាន ដោយសារតែគាត់មានខ្សែទុយោ និងមានទំនាក់ទំនងល្អ
ជាមួយលោក ប៉ាង វ៉ាន់ថន ជាប្រធានសាខាគយខេត្តកោះកុង
ទើបគាត់អាចនាំចូលប្រេងគេចពន្ធ ក្នុងមួយថ្ងៃៗរាប់ម៉ឺនលីត្រ
រួមទាំងគ្រឿងទេស និងទំនិញចម្រុះក្នុងមួយថ្ងៃៗរាប់តោន
គ្មាននរណាហ៊ានប៉ះពាល់។
ពាក់ព័ន្ធនឹងករណីដែលគ្មានការបង្ក្រាប
អំពើរត់ពន្ធទំនិញយ៉ាងអនាធិបតេយ្យតាមដែនសមុទ្រ
ក្នុងទឹកដីខេត្តកោះកុង ត្រូវបានជំនាញគយមួយចំនួនលើកឡើងថា
ឈ្មួញជាច្រើនសុទ្ធសឹងជាមន្ត្រីរាជការ
និងប្រើស្បែកជាកម្លាំងប្រដាប់អាវុធ ទើបមានការយោគយល់
គ្មានការបង្ក្រាបសុខចិត្តទទួលយកលុយ
ជាប្រចាំជើងឬប្រចាំខែពីក្រុមឈ្មួញ។ ជាពិសេសសមត្ថកិច្ចគយចល័ត
ប្រចាំនៅមាត់ច្រកប៉ាក់ខ្លង ដឹកនាំដោយលោក ម៉ៅ ទ័រ និងលោក ឱម ស៊ីនួន
គឺជាអ្នកត្រូវប៉ាន់ជាងគេ ក្នុងការឃុបឃិតបើកភ្លើងខៀវ
ឲ្យមេឈ្មួញទាំងតូចទាំងធំ នាំចូលទំនិញគេចពន្ធ
តាមដែនសមុទ្រមកលក់ចែកចាយ ពេញខេត្តកោះកុង
ឬបន្តឡើងមកកាន់ខេត្តព្រះសីហនុ មិនដែលមានការបង្ក្រាប៕
ប្រភពៈ វត្តភ្នំ
No comments:
Post a Comment