ភ្នំពេញ: បន្ទាប់ពីដឹកនាំបាតុកររាប់ម៉ឺននាក់
ដើរហែក្បួន ទៅដាក់ញត្តិ នៅស្ថានទូតចិន កាលពីម៉ោងជិត ១២
ថ្ងៃទី២៥តុលានេះ លោកសមរង្ស៊ី បានថ្លែងលើកសរសើរចិនយ៉ាងច្រើន។
លោកសមរង្ស៊ី ក៏បានប្រកាសពីការបង្កើតទំនាក់ទំនងល្អ
រវាងគណបក្សកុម្មុយនីស្តចិន និងគណបក្សសង្គ្រោះជាតិ
ដែលជាគណបក្ស ប្រឆាំងនៅកម្ពុជាផងដែរ។នៅមុខស្ថានទូតចិន នៅម៉ោងប្រមាណ ១២ ថ្ងៃត្រង់ លោកសមរង្ស៊ី បានថ្លែងទៅកាន់ក្រុមអ្នកកាសែតថា ញត្តិរបស់គណបក្សសង្គ្រោះជាតិ បានប្រគល់ជូនលោកតំណាងលោកជំទាវ ឯកអគ្គរដ្ឋទូតចិន ប្រចាំកម្ពុជា និងបានទទួលថ្នាក់ដឹកនាំគណបក្សសង្គ្រោះជាតិ យ៉ាងកក់ក្តៅជាទីបំផុត។ យើងបានសន្ទនាអំពីស្ថានការណ៍នយោបាយ នៅកម្ពុជា ហើយទំនាក់ទំនងល្អរវាងកម្ពុជា និងសាធារណៈរដ្ឋប្រជាមានិតចិន។
លោកសមរង្ស៊ី បានបន្តថា "ខ្ញុំបានជម្រាបលោកតំណាងស្ថានទូតចិន ថាប្រទេសចិន មានតែមិត្តទេ នៅប្រទេសកម្ពុជា។ គណបក្សណា និន្នាការខាងណា គឺចាត់ទុកប្រទេសចិន ជាមិត្ត មិនមែនដូចប្រទេសមួយទៀត ដែលមានមិត្តតិច ហើយមានសត្រូវច្រើន។ មិនមែនយើងចាត់ប្រទេសមួយទៀត ជាសត្រូវទេ តែប្រទេសមួយទៀត ចាត់យើងជាសត្រូវ ព្រោះចង់លេបទឹកដីយើង។ តែចំពោះប្រទេសចិន គឺខ្មែរទាំងអស់ គណបក្សទាំងអស់ ស្រលាញ់រាប់អានប្រទេសចិន ហើយយើងនឹងរក្សា ពង្រឹងទំនាក់ទំនងរវាងគណបក្សកុម្មុយនីស្តចិន និងគណបក្សសង្គ្រោះជាតិ"។
លោក សម រង្ស៊ី បានបញ្ជាក់ថា ការចូលដាក់ញត្តិ នៅស្ថានទូតចិន ប្រើពេលយូរជាងទូតផ្សេងទៀតនោះ ដោយសារតែមានរឿងនិយាយច្រើន។ ចំពោះសំណួរថា ជំហររបស់ចិនបែបណាដែរ ចំពោះរដ្ឋាភិបាលកម្ពុជា បច្ចុប្បន្ន? ត្រូវបានលោកសមរង្ស៊ី បញ្ជាក់ទៅកាន់អ្នកកាសែតថា គេគោរពឯករាជ្យភាព បូរណភាពទឹកដីប្រទេសកម្ពុជា។
រីឯសំណួរថា ចិនគាំទ្ររដ្ឋាភិបាលកម្ពុជា បច្ចុប្បន្ននេះ ឬទេ? ត្រូវបានលោកសមរង្ស៊ី បានឆ្លើយតបថា "គេគាំទ្រឆន្ទៈប្រជារាស្ត្រខ្មែរ ហើយថា ប្រជារាស្ត្រខ្មែរ អាចពឹងពាក់លើប្រទេសចិន ដើម្បីការពារបូរណភាពទឹកដីរបស់យើង"។
សូមបន្ថែមថា ក្នុងពេលហែក្បួនបាតុកម្ម នៅព្រឹកថ្ងៃទី២៥ ខែតុលា ឆ្នាំ២០១៣ ដែលជាថ្ងៃបង្ហើយនៃបាតុកម្មរយៈពេល ៣ ថ្ងៃ របស់គណបក្សសង្គ្រោះជាតិ លោកសមរង្ស៊ី និងលោក កឹមសុខា បានដឹកនាំបាតុកររាប់ម៉ឺននាក់ ដើរហែក្បួន ទៅដាក់ញត្តិ នៅស្ថានទូតអូស្ត្រាលី ស្ថានទូតរុស្ស៊ី ស្ថានទូតជប៉ុន ឥណ្ឌូនេស៊ី និងស្ថានទូតចិន។ ក្នុងពេលធ្វើបាតុកម្ម កាលពីថ្ងៃទី២៤តុលា លោកសមរង្ស៊ី និងលោក កឹមសុខា បានដឹកនាំបាតុករ ទៅដាក់ញត្តិ នៅស្ថានទូតបារាំង អង់គ្លេស និងទូតអាមេរិក។ រីឯបាតុកម្ម កាលពីថ្ងៃទី២៣តុលា គណបក្សសង្គ្រោះជាតិ បានដាក់ញត្តិ និងស្នាមមេដៃ ទៅកាន់អង្គការសហប្រជាជាតិ។ បន្ទាប់ពីចេញពីដាក់ញត្តិ នៅស្ថានទូតជប៉ុន ជាមួយនឹងលោក កឹមសុខា គឺលោក សម រង្ស៊ី បានថ្លែងទៅកាន់ក្រុមអ្នកកាសែតថា ស្ថានទូតជប៉ុន បានទទួលញត្តិយើង ហើយបានសន្យាថា នឹងយកញត្តិនេះ បញ្ជូនទៅថ្នាក់លើ ទៅដល់រដ្ឋាភិបាលជប៉ុន នៅទីក្រុងតូក្យូ។ យើងក៏បានរម្លឹកដល់តួនាទីដ៏សំខាន់ របស់ប្រទេសជប៉ុន ក្នុងការចុះហត្ថលេខាលើកិច្ចព្រមព្រៀងទីក្រុងប៉ារីស។
លោកសមរង្ស៊ី បន្តថា ជប៉ុន ក៏ជាប្រទេស ដែលផ្តល់ជំនួយឲ្យប្រទេសកម្ពុជា យ៉ាងច្រើនលើសលុប ហើយប្រទេសជប៉ុនឥទ្ធិពលគួរសម ដើម្បីជំរុញឲ្យកម្ពុជាអនុវត្តកិច្ចព្រមព្រៀងទីក្រុងប៉ារីស ឲ្យបានពេញលេញ ហើយគោរពគោលការណ៍ប្រជាធិបតេយ្យ ឲ្យបានត្រឹមត្រូវ ដើម្បីផ្តល់យុត្តិធម៌ ជូនប្រជារាស្ត្រខ្មែរ ហើយគេឯកភាពតាមសាររបស់យើង។ លោក សម រង្ស៊ី បន្តថា ក្នុងពេលដាក់ញត្តិនៅទូតជប៉ុន លោក ជាមួយនឹងលោក កឹមសុខា បានប្រាប់តំណាងទូតជប៉ុនថា ពេលណាគេ ( គណបក្សប្រជាជនកម្ពុជា ) ផ្តល់យុត្តិធម៌ជូនប្រជារាស្ត្រខ្មែរ តាមឆន្ទះប្រជារាស្ត្រខ្មែរពិតប្រាកដ ពេលនោះ យើងសុខចិត្តចូលទៅរដ្ឋសភា។
នៅចំពោះមុខទូតឥណ្ឌូនេស៊ី ដែលស្ថិតនៅជិតទូតជប៉ុន លោកសមរង្ស៊ី ក៏បានថ្លែងក្រោយពីដាក់ញត្តិថា លោកបានថ្លែងអំណរគុណ ចំពោះប្រជារាស្ត្រ និងរដ្ឋាភិបាល ឥណ្ឌូនេស៊ី ដែលតែងតែគាំទ្រលទ្ធិប្រជាធិបតេយ្យ នៅប្រទេសកម្ពុជា ជាពិសេសឥណ្ឌូនេស៊ី បានធ្វើជាសហប្រធាន នៃសន្និសីទអន្តរជាតិ ទីក្រុងប៉ារីស ស្តីពី កម្ពុជា ដែលបាននាំមកនូវកិច្ចព្រមព្រៀងទីក្រុងប៉ារីស ស្តីពីកម្ពុជា ឆ្នាំ១៩៩១។
លោកសមរង្ស៊ី បន្តថា "យើងក៏សូមស្នើឲ្យប្រទេសឥណ្ឌូនេស៊ី យកកិច្ចព្រមព្រៀងទីក្រុងប៉ារីសនេះ យកមកជំរុញឲ្យហត្ថលេខីដទៃទៀត អនុវត្តកិច្ចព្រមព្រៀងទីក្រុងប៉ារីសនេះ ឲ្យបានត្រឹមត្រូវ និងឲ្យបានពេញលេញ ហើយយើងក៏បានបញ្ជាក់ថា យើងគោរពប្រទេសឥណ្ឌូនេស៊ីណាស់។ ប្រទេសឥណ្ឌូនេស៊ី ជាប្រទេសសមាជិកសមាគមអាស៊ាន ជាប្រទេសជិតខាងយើង ហើយដែលបានអនុវត្តលទ្ធិប្រជាធិបតេយ្យ។ លទ្ធិប្រជាធិបតេយ្យ ស្រុកគេ បានចាក់ឫស ចាក់គល់។ គេមានសិទ្ធិសេរីភាពពេញលេញ សិទ្ធិសារព័ត៌មាន។ គេបោះឆ្នោតត្រឹមត្រូវ។ គណៈកម្មការបោះឆ្នោត នៅប្រទេសគេ គឺមានភាពឯករាជ្យ។ គណបក្សទាំងអស់ ទទួលស្គាល់ ទទួលយកលទ្ធផលនៃការបោះឆ្នោតនិមួយៗ"។
លោកសមរង្ស៊ី បន្តថា "យើងបានប្រាប់គាត់ថា យើងគោរពប្រទេសឥណ្ឌូនេស៊ី ហើយជឿជាក់ថា ប្រទេសឥណ្ឌូនេស៊ី អាចធ្វើជាគំរូ សម្រាប់ប្រទេសកម្ពុជាបាន ក្នុងការអនុវត្តលទ្ធិប្រជាធិបតេយ្យ"៕
ប្រភពៈ ភូមិអច្ឆរិយៈ
No comments:
Post a Comment