សាលារាជធានី ដាក់កំណាត់វិថី ព្រះសុធារសជាផ្លូវ ឯកទិស ដើម្បីសម្រួល ការកកស្ទះចរាចរណ៍

ភ្នំពេញ៖ សាលារាជធានីភ្នំពេញ បានសម្រេចដាក់កំណាត់វិថី ព្រះសុធារសកាត់មុខផ្សារទំនើប​អ៊ីអន ចាប់ពីស្ថានទូតរុស្ស៊ី រហូតដល់ភ្លើងស្តុបជលផល ជាផ្លូវឯកទិសក្នុងគោលបំណងកាត់បន្ថយ​ការ​កកស្ទះ ចរាចរណ៍។ ចំណាត់ការថ្មីនេះ នឹងចាប់ផ្តើមអនុវត្តន៍ពីម៉ោង ៨ព្រឹកថ្ងៃទី២ ខែមីនា ឆ្នាំ២០១៥ នេះតទៅ។

យោងតាមការជូនដំណឹងរបស់សាលារាជធានីភ្នំពេញនាព្រឹកថ្ងៃទី២៨ ខែកុម្ភៈ ឆ្នាំ២០១៥ បានឲ្យ​ដឹងថា ការធ្វើចរាចរណ៍លើកំណាត់ផ្លូវនេះ គឺយានយន្តទាំងអស់ អាចធ្វើចរាចរពីទិសស្ថានទូត​រុស្សីឆ្ពោះទៅភ្លើង ស្តុបជលផល តែ១ទិសប៉ុណ្ណោះ​។ ការធ្វើចរាចរយានយន្ត ពីទិសភ្លើងស្តុបជល​ផលឆ្ពោះទៅស្ថានទូត រុស្ស៊ី មិនអនុញាត្តឡើយ ។

សាលារាជធានីភ្នំពេញ អំពាវនាវដល់សាធារណជនទាំងអស់ ចូលរួមអនុវត្តឲ្យមានប្រសិទ្ឋិភាព។សូម បញ្ជាក់ថា កំណត់វិថីព្រះសុធារស់ បានក្លាយជាវិថី ដែលកកកុញដោយការធ្វើចរាចរណ៍ និង​មមាញឹកជាទីបំផុត បន្ទាប់ពីផ្សារទំនើបអ៊ីអន របស់ជប៉ុនបានចាប់ផ្តើមដំណើរការ កាល​ពីឆ្នាំ​២០១៤​​កន្លងទៅនេះ។ កំណាត់វិថីមួយនេះ ត្រូវបានគេមើលឃើញថា តែតែកកស្ទះចរាចរណ៍​យ៉ាង​ខ្លាំង ជាពិសេសគឺនៅពេលរសៀល៕

ប្រភពៈ ដើមអំពិល