ភ្នំពេញ: បើទោះបីជាមិនមានការផាកពិន័យនៅសប្តាហ៍ទី១
កន្លងមកនេះ សាលារាជធានីភ្នំពេញ បានព្រមានចំពោះរថយន្តធំធុនធ្ងន់
និងរថយន្តជាប់បម្រាមដទៃទៀតដែលចូលក្រុងនៅពេលថ្ងៃថា
ចាប់ពីសប្តាហ៍ទី២ សាលារាជធានីភ្នំពេញ
នឹងធ្វើការឃាត់ទុករថយន្តធំៗទាំងនោះ(តែមិនផាកពិន័យដដែល)
ដើម្បីអោយម្ចាស់រថយន្តទាំងនោះ អនុវត្តច្បាប់ចេញចូលរាជធានីភ្នំពេញ
អោយបានល្អប្រសើរ។
ការព្រមាននេះ បានធ្វើឡើងដោយលោកប៉ា
សុជាតិវង្ស អភិបាលរាជធានីភ្នំពេញ ក្នុងឱកាសលោកអញ្ជើញជាអធិបតី
ក្នុងពិធីសម្ពោធសណ្ឋាគារអេលីតបូទិក ថ្នាក់ផ្កាយ៣
ដែលមានទីតាំងស្ថិតនៅតាមបណ្តោយផ្លូវត្រសក់ផ្អែម
ក្នុងសង្កាត់ផ្សារថ្មីទី៣ ខណ្ឌដូនពេញ
កាលពីល្ងាចថ្ងៃទី២ខែវិច្ឆិកា ឆ្នាំ២០១៣នេះ។
លោកប៉ា
សុជាតិវង្ស បានមានប្រសាសន៍ថា ការហាមឃាត់រថយន្តធំៗចូលក្រុង
នៅពេលថ្ងៃនេះ មិនអាចធ្វើបាន ក្នុងពេលតែមួយថ្ងៃនោះទេ
ត្រូវទាមទារពេលមួយរយៈ ដើម្បីធ្វើវា ទើបទទួលបានផ្លែផ្កា។
ដោយដំបូងយើងត្រូវកែទម្លាប់អ្នកបើកបរ ពីការបើកបរចូលក្រុង
នៅពេលថ្ងៃ ទៅជាទម្លាប់បើកបរចូលក្រុង នៅពេលយប់វិញ
ក៏ត្រូវប្រើពេលមួយរយៈដែរ មិនអាចធ្វើភ្លាមៗ ទៅបាននោះទេ។
លោក
បានបញ្ជាក់ថាៈ" ការធ្វើយ៉ាងដូចច្នេះ គឺមិនមានន័យថា
គាបសង្កត់លើវិស័យឯកជនលើការដឹកជញ្ចូនទំនិញ
ចេញចូលរាជធានីភ្នំពេញនោះទេ "។ ជាមួយគ្នានេះ លោកអះអាងថាៈ
"ទាល់តែចូលរួមអនុវត្តទាំងរដ្ឋ និងផ្នែកឯកជន ទើបកិច្ចការនេះ
ទទួលបានជោគជ័យ "។
កាលពីខែតុលាឆ្នាំ២០១៣ លោកប៉ា សុជាតិវង្ស
អភិបាលរាជធានីភ្នំពេញ បានដាក់ចេញនូវវិធានការមួយចំនួន
ដើម្បីការពារទប់ស្កាត់កុំឲ្យរថយន្តធំៗ បើកបរតាមផ្លូវមួយចំនួន
ក្នុងខណ្ឌចំនួន៤ ដែលបណ្តាលឲ្យខូចផ្លូវ
និងអាចបង្កការកកស្ទះចរាចណ៍
និងបង្កគ្រោះថ្នាក់ដល់ប្រជាពលរដ្ឋធ្វើដំណើរនៅពេលថ្ងៃ។
លោកប៉ា សុជាតិវង្ស បានមានប្រសាសន៍ថាៈ" រថយន្តធំៗ
បានបង្កឲ្យប្រជាពលរដ្ឋភ័យខ្លាច ពីព្រោះវាងាយបង្កគ្រោះថ្នាក់
ដល់អ្នកធ្វើដំណើរតាមដងផ្លូវ ប៉ុន្តែថា រថយន្តទាំងនោះ
អាចធ្វើចរាចរឆ្លងកាត់ខណ្ឌដូនពេញ ៧មករា ចំការមន និងទួលគោក
បានចាប់ពីម៉ោង ៩យប់ ដល់ម៉ោង ៦ភ្លឺបាន "។
រថយន្តដឹកទំនិញ
ប្រភេទធំៗ អាចធ្វើចរាចរបាន នៅផ្លូវក្រវាត់ក្រុង គឺស្ពានព្រែកព្នៅ
ផ្លូវទំនប់កប់ស្រូវកំណាត់ផ្លូវជាតិលេខ៤ ផ្លូវចោមចៅ ផ្លូវជើងឯក
ផ្លូវ៣៧១ ទំនប់បឹងទំពុន កំណាត់ផ្លូវ ២៧១ ជាដើម។
រថយន្តធុនធ្ងន់អាចឆ្លងកាត់ខណ្ឌទាំងបួនបាន លុះត្រាមានភាពចាំបាច់
និងមានទម្ងន់មិនលើសពី ១០តោន
ព្រមទាំងមានលិខិតអនុញ្ញាតពីសាលារាជធានីភ្នំពេញ
តាមរយៈមន្ទីរសាធារណការ។
កន្លងមក
ក៏មានការហាមឃាត់មិនឲ្យឡានធំៗ បើកបរចូលក្រុងភ្នំពេញ នៅពេលថ្ងៃដែរ
ក៏ប៉ុន្តែមានក្រុមហ៊ុនមួយចំនួន នៅតែបំពានបម្រាមនោះដដែល។
ក្រុមអ្នករិះគន់ បាននិយាយថា វិធានការហាមឃាត់រថយន្តចូលក្រុង
នៅពេលថ្ងៃ មិនអាចទទួលជោគជ័យបាននោះទេ
ព្រោះមន្ត្រីមានសមត្ថកិច្ចគ្រប់លំដាប់ថ្នាក់ និងនៅតាមផ្លូវ
អាជ្ញាធរមួយចំនួន តាំងពីខណ្ឌ ដល់រាជធានី
ទទួលសំណូកពីពួកថៅកែក្រុមហ៊ុនឡានដឹកទំនិញ និងឡានដឹកដី ថ្ម ខ្សាច់
និងគ្រឿងសំណង់ ឡានក្រឡុកស៊ីម៉ង់ត៍។ល។ ទាំងនោះ។
ប្រជាពលរដ្ឋ
នៅរាជធានីភ្នំពេញ កំពុងរង់ចាំមើលថា
តើបទបញ្ជារបស់លោកអភិបាលរាជធានីភ្នំពេញ
ទាក់ទងនឹងវិធានការហាមឃាត់រថយន្តចូលក្រុង នៅពេលថ្ងៃ
មានឥទ្ធិពលអនុវត្ត បានប៉ុន្មានខែដែរ?៕
ប្រភពៈ CEN
No comments:
Post a Comment