ព្រះវិហារ៖ កម្ពុជានៅតែរក្សាភាពស្ងាត់ស្ងៀម
នៅតំបន់ព្រំដែន ប្រាសាទព្រះវិហារ ខណៈ ដែលប្រទេសថៃ
បានបញ្ជូនកងទ័ព ចូលទៅតំបន់ព្រំដែន
និងបានហ្វឹកហាត់ ជម្លៀសប្រជាជន ចេញពីតំបន់ព្រំដែន។ លោកឧត្តមសេនីយ៍
ជា តារា មេបញ្ជាការកងទ័ពជួរមុខព្រំដែនព្រះវិហារ
បានអះអាងថាវាជាសិទ្ធរបស់ថៃក្នុងការចល័តទ័ពក្នុងទឹកដីរបស់ខ្លួន
ប៉ុន្តែភាគីកម្ពុជា
បានត្រៀមលក្ខណៈគ្រប់គ្រាន់ដើម្បីការពារទឹកដីរបស់ខ្លួន។
នៅសល់តែមួយអាទិត្យទៀតតែប៉ុណ្ណោះ
សាលដីការក្រុងឡាអេ ស្តីពីភាពជាម្ចាស់នៅលើតំបន់ប្រសាទព្រះវិហារ
នឹងត្រូវបកស្រាយជាផ្លូវការ។ ភាគីកម្ពុជា
នៅតែប្រកាន់យកគោលការស្ងាត់ស្ងៀមនៅតាមតំបន់ព្រំដែនកម្ពុជា-ថៃដដែល
ខណៈភាគីថៃ កំពុងចល័តទ័ពនៅតាមតំបន់ព្រំដែន។
ថ្លែងប្រាប់វិទ្យុបារាំងអន្តរជាតិ RFI
នៅថ្ងៃអាទិត្យទី៣ វិច្ឆិកានេះ នាយឧត្តមសេនីយ៍ជា តារា
មេបញ្ជាការកងទ័ពជួរមុខព្រំដែនប្រាសាទព្រះវិហារ បាននិយាយថា
កងទ័ពកម្ពុជាគឺប្រកាន់គោលការណ៍រក្សាសន្តិភាព និងសន្តិសុខ
ដោយបន្តនៅស្ងាត់ស្ងៀម។ ប៉ុន្តែលោកមេបញ្ជាការរូបនេះ បានបញ្ជាក់ថា
កម្ពុជាបានត្រៀមលក្ខណៈគ្រាប់គ្រាន់សម្រាប់ក្នុងការងារស្វ័យការពារ
និងការអនុវត្តសេចក្តីសម្រេចរបស់តុលាការក្រុងឡាអេ។
កាសែតបាងកកប៉ុស្តិ៍របស់ថៃ កាលពីថ្ងៃសៅរ៍ទី២ វិច្ឆិកា
បានចុះផ្សាយអំពីការ
បញ្ជូនកងទ័ពចូលទៅកាន់ខេត្តស៊ីសាកេតដែលមានព្រំដែនជាប់នឹងទឹកដី
កម្ពុជា ដើម្បីហ្វឹកហាត់ប្រយុទ្ធ និងហ្វឹកហាត់ជម្លៀសប្រជាជន។
ឆ្លើយតបនឹងការចល័តទ័ពរបស់ថៃ លោកនាយឧត្តមសេនីយ៍ ជា តារា
មេបញ្ជាការកងទ័ពជួរមុខព្រំដែនប្រសាទព្រះវិហារ
បានលើកឡើងថាប្រទេសថៃអាចចល័តទ័ព
និងធ្វើសកម្មភាពអ្វីៗទាំងអស់ក្នុងទឹកដីរបស់ខ្លួនបាន។
ហើយកម្ពុជាក៏មិនអាចហាមឃាត់ចំពោះសកម្មភាពរបស់ថៃបាននោះឡើយ។
គួរបញ្ជាក់ថានៅថ្ងៃទី១១ វិច្ឆិកាខាងមុខនេះ
តុលាឡាកាយុត្តិធម៌អន្តរជាតិឡាអេ
នឹងបកស្រាយសាលក្រមឆ្នាំ១៩៦២ស្តីពីការកាន់កាប់តំបន់ប្រាសាទព្រះវិហារ។
កម្ពុជាដែលដើមបណ្តឹង ត្រូវបង្ខំចិត្តដាក់ពាក្យបណ្តឹងនេះ
កាលពីចុងខែមេសា ឆ្នាំ២០១១ បន្ទាប់ពីរដ្ឋាភិបាលថៃរបស់លោកអាប់ភីស៊ីត
វេចាជីវ៉ា បានទាមទារកាន់កាន់តំបន់៤,៦
គីឡូម៉ែត្រក្រឡា ជុំវិញប្រាសាទព្រះវិហារ។
យ៉ាងណាក៏ដោយទាក់ទងនឹងសេចក្តីសម្រេច លើការបកស្រាយលាលក្រមស្តីពី
ភាពជាម្ចាស់នៅតំបន់ប្រសាទព្រះវិហារ ប្រមុខការទូតកម្ពុជា
និងថៃកាលពីដើមសប្តាហ៍កន្លងទៅនេះ បានសន្យាជាឧឡារឹកថា
នឹងរក្សាទំនងនងល្អរវាងប្រទេសទាំងពីរ
បើទោះបីជាសាលដីការបែបណាក៏ដោយនោះ៕
ប្រភពៈ ភូមិអច្ឆរិយៈ
No comments:
Post a Comment