ប្រាក់ខែ គ្រូបង្រៀន មន្ដ្រីរាជការ កម្លាំងប្រដាប់អាវុធទាំងអស់ នឹងត្រូវដំឡើងម្ដងទៀតនៅខែមេសា មុនចូលឆ្នាំថ្មីខ្មែរ!

(ភ្នំពេញ)៖ ប្រាក់បៀវត្សប្រចាំខែសម្រាប់ គ្រូបង្រៀន មន្ដ្រីរាជការ កម្លាំងប្រដាប់អាវុធគ្រប់ប្រភេទ នឹងត្រូវដំឡើងម្ដងទៀត នៅខែមេសា ឆ្នាំ២០១៧ខាងមុខនេះ ពោលគឺមុនបុណ្យចូលឆ្នាំថ្មីប្រពៃណីខ្មែរ ឈានចូលមកដល់។

ប្រាក់ខែសម្រាប់មន្ដ្រីរាជការ កម្លាំងប្រដាប់អាវុធគ្រប់ប្រភេទ ត្រូវបានដំឡើងម្ដងរួចមកហើយ កាលពីខែមករា ឆ្នាំ២០១៧ ដូច្នេះ​ក្នុង​មួយឆ្នាំៗមន្រ្ដីរាជការ កម្លាំងប្រដាប់អាវុធ ត្រូវបានដំឡើងប្រាក់ខែពីរដង។

អ្នកនាំពាក្យ និងជារដ្ឋលេខាធិការ ក្រសួងមុខងារសាធារណៈ លោក យក់ ប៊ុនណា បានថ្លែងប្រាប់អង្គភាព Fresh News តាមទូរស័ព្ទនៅរសៀលថ្ងៃទី​១០ ខែមីនា ឆ្នាំ២០១៧ថា ដើម្បីចូលរួមលើកកម្ពស់ ជីវភាពរបស់មន្ដ្រីរាជការ កម្លាំងប្រដាប់អាវុធ រាជរដ្ឋាភិបាលកម្ពុជា បានយកចិត្តទុកដាក់​យ៉ាងខ្លាំង ចំពោះការដំឡើងប្រាក់បៀវត្សជូនពួកគាត់ ដោយមួយឆ្នាំ ត្រូវដំឡើងពីរដង ដោយម្ដងនៅខែមករាដើមឆ្នាំ និងម្ដងទៀតនៅមុន​បុណ្យចូលឆ្នាំខ្មែរ។

អ្នកនាំពាក្យរូបនេះ បានថ្លែងបញ្ជាក់ទៀតថា នៅដើមឆ្នាំ២០១៧ ការដំឡើងប្រាក់បៀវត្ស គឺជាការដំឡើងប្រាក់បៀវត្សមូលដ្ឋាន ដែលមានអត្រា ១២ភាគរយជារៀងរាល់ឆ្នាំ។ ចំណែកឯការដំឡើងប្រាក់បៀវត្ស នៅមុនចូលឆ្នាំខ្មែរ គឺជាការដំឡើងប្រាក់បំណាច់មុខងារ​​​របស់មន្ដ្រីរាជការ និងកម្លាំងប្រដាប់អាវុធ។

លោកបញ្ជាក់ទៀតថា សម្រាប់ការដំឡើងប្រាក់បំណាច់មុខងារ ឆ្នាំ២០១៧នេះ មន្ត្រីរាជការស៉ីវិល ដែលមានប្រាក់បំណាច់​មុខងារទាបបំផុត នឹងត្រូវផ្តល់ជូន១០ម៉ឺនរៀលក្នុងមួយខែ ហើយមន្ត្រីរាជការដែលមាន ប្រាក់បំណាច់មុខងារខ្ពស់បំផុត​នឹងត្រូវផ្តល់ជូន៤ ម៉ឺនរៀលក្នុងមួយខែ។ មន្ត្រីរាជការស៉ីវិលផ្សេងទៀត​អាចទទួលបាន​ការដំឡើងប្រាក់បំណាច់មុខងារ​ចំនួន៩ម៉ឺនរៀល ៨ម៉ឺនរៀល ឬ ៥ម៉ឺនរៀល ផ្អែកលើប្រភេទមុខតំណែងនីមួយៗ។

ជាមួយគ្នានេះដែល លោក យក់ ប៊ុនណា បានបញ្ជាក់ឲ្យដឹងផងដែរថា ក្រសួងមុខងារសារធារណៈ កំពុងរៀបចំ​អនុក្រឹត្រ ស្ដីពីការដំឡើងប្រាក់ បំណាច់មុខងារសម្រាប់ឆ្នាំ២០១៧ របស់មន្ដ្រីរាជការ កម្លាំងប្រដាប់អាវុធ ដាក់ជូនទៅសម្ដេចតេជោ ហ៊ុន សែន ដើម្បីពិនិត្យ និងធ្វើការ​សម្រេច។

ថ្លែងនៅក្នុងឱកាសអញ្ជើញជាអធិបតីភាព កាត់ខ័ណ្ឌសីមា វត្តកំពង់ត្របែក ស្ថិតនៅក្នុងស្រុកកំពង់ត្របែក ខេត្តព្រៃវែង នៅថ្ងៃទី១០ ខែមីនា ឆ្នាំ២០១៧ម្សិលមិញនេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានថ្លែងថា ការដំឡើង​ប្រាក់ខែ​សម្រាប់ មន្ដ្រីរាជការ និងកម្លាំងប្រដាប់អាវុធ ជាការដំឡើង​លុយពិតជាក់ស្ដែង មិនដូចការដើរសន្យា​ខ្យល់ របស់បុគ្គលមួយចំនួននោះឡើយ។

សម្ដេចតេជោបានថ្លែងយ៉ាងដូច្នេះថា «នៅក្នុងខែមេសាខាងមុខនេះ ត្រូវបានដំឡើងប្រាក់ខែទៀតហើយ សម្រាប់មន្ត្រីរាជការ កម្លាំងប្រដាប់អាវុធ ហើយលុយនោះជាលុយពិត មិនមែនជាលុយក្លែងក្លាយ ហើយមិនមែនសន្យាខ្យល់ដែរ ហើយបើកតាមធនាគារ រៀងរាល់ថ្ងៃទី២៣ បើកបានហើយ»។

ក្រៅពីការដំឡើងប្រាក់បៀវត្សពីរដងក្នុង១ឆ្នាំហើយនោះ រាជរដ្ឋាភិបាលកម្ពុជា ថែមទាំងផ្ដល់នូវប្រាក់ឧបត្ថម្ភ ក្នុងឱកាសបុណ្យ​ចូល​ឆ្នាំ​ខែ្មរផងដែរ ដោយសម្ដេចតេជោបាន អះអាងកាលពីពេលថ្មីៗនេះថា នៅបុណ្យចូលឆ្នាំថ្មី​ប្រពៃណីខ្មែរខាងមុខនេះ សម្ដេចនឹងឧបត្ថម្ភ ថវិការជូនមន្ដ្រីរាជការ កម្លាំងប្រដាប់អាវុធទូទាំងប្រទេស ក្នុងម្នាក់៥ម៉ឺនរៀល ដែលសរុបទាំងអស់ត្រូវចំណាយថវិកាប្រមាណ ៧​លានដុល្លាអាមេរិក។

ការលើកកម្ពស់ជីវភាពរស់នៅ របស់មន្ដ្រីរាជការ និងកម្លាំងប្រដាប់អាវុធ គឺជាការយកចិត្តទុកដាក់សំខាន់ និងអាទិភាពមួយ​របស់រាជរដ្ឋាភិបាល កម្ពុជា ដោយកំណត់ថា នៅឆ្នាំ២០១៨មន្រ្ដីរាជការ និងកម្លាំងប្រដាប់អាវុធទាំងអស់ នឹងទទួលបានប្រាក់បៀវត្ស យ៉ាងតិច​១លានរៀល។

នៅមេសា ឆ្នាំ២០១៧ មន្ត្រីរាជការ កម្លាំងប្រដាប់អាវុធទទួលបានប្រាក់បៀវត្សអប្បបរមា (ទាបបំផុត) ចំនួន៖

១៖ មន្ដ្រីរាជការស៊ីវិល វិស័យរដ្ឋបាល ការទូត បច្ចេកទេស ៨៥៣,៥០០រៀល។

២៖ មន្ដ្រីរាជការក្នុងវិស័យអប់រំ ​​​​​​​​​​​​​​​​៩៥៣,៥០០ រៀល។

៣៖ មន្ដ្រីរាជការក្នុងវិស័យសុខាភិបាល ៩៥៣,៥០០។

៤៖ នគរបាលជាតិ ៩៣៧,៧៣០។

៥៖ យោធិន ៨៨០,៧៣០។

៦៖ ចៅក្រម និងព្រះរាជអាជ្ញា ​​​៣,០០០,០០០រៀល។

៧៖ ក្រុមប្រឹក្សារាជធានី ខេត្ត​ ៩៧០,០០០រៀល។

៨៖ ក្រុមប្រឹក្សាក្រុង ស្រុក ខណ្ឌ ​​៧៥០,០០០រៀល។

៩៖ ក្រុមប្រឹក្សាឃុំ សង្កាត់ ៥៧០,០០០រៀល។

១០៖ ប្រធានភូមិ ២២៥,០០០ រៀល។

១១៖ អនុប្រធានភូមិ ១៨០,០០០រៀល។

១២៖ សមាជិកភូមិ ១៦០,០០០៕

ប្រភព៖ kh-empire